തിരുവനന്തപുരം: കര്ണാടക സര്ക്കാര് അന്യായമായി തുറുങ്കിലടച്ച പി.ഡി.പി.ചെയര്മാന് അബ്ദുന്നാസിര് മഅദനിയെ മോചിപ്പിക്കാന് കേന്ദ്ര-സംസ്ഥാന സര്ക്കാറുകള് അടിയന്തരമായി ഇടപെടണമെന്ന് മുസ്ലിം സംഘടനാ നേതാക്കള് സംയുക്തപ്രസ്താവനയില് ആവശ്യപ്പെട്ടു. വികലാംഗനും രോഗിയുമായ മഅദനി വീണ്ടും അറസ്റ്റ്ചെയ്യപ്പെട്ടിട്ട് ഒരു കൊല്ലമായി. കള്ളക്കഥകളും വ്യാജമൊഴികളും സൃഷ്ടിച്ച് നിരപരാധിയായ മതപണ്ഡിതന്റെ ജയില്മോചനം അസാധ്യമാക്കാന് ഗൂഢശ്രമം നടത്തുന്നത് ജനാധിപത്യവ്യവസ്ഥയോടുള്ള വെല്ലുവിളിയാണ്. മതേതര പ്രസ്ഥാനങ്ങളാല് നിയന്ത്രിക്കപ്പെടുന്ന കേന്ദ്ര, സംസ്ഥാന സര്ക്കാറുകള് ഇതിനെതിരെ ജാഗ്രതപുലര്ത്തണം. ദക്ഷിണ കേരള ജംഇയ്യത്തുല് ഉലമ സംസ്ഥാനസെക്രട്ടറി തൊടിയൂര് മുഹമ്മദ് കുഞ്ഞ് മൗലവി, ജമാഅത്തെ ഇസ്ലാമി സംസ്ഥാന അമീര് ടി. ആരിഫലി, സംസ്ഥാന കേരള ജംഇയ്യത്തുല് ഉലമ പ്രസിഡന്റ് പാണക്കാട് അബ്ദുല് ജബ്ബാര് അലി ശിഹാബ്തങ്ങള്, പോപ്പുലര്ഫ്രണ്ട് ഓഫ് ഇന്ത്യ സംസ്ഥാന പ്രസിഡന്റ് കരമന അഷറഫ് മൗലവി, ജമാഅത്ത് ഫെഡറേഷന് ജനറല് സെക്രട്ടറി അഡ്വ. കെ.പി. മുഹമ്മദ്, മുസ്ലിം സംയുക്തവേദി ചെയര്മാന് പാച്ചല്ലൂര് അബ്ദുസ്സലീം മൗലവി, സുന്നി യുവജനസംഘം സംസ്ഥാന സെക്രട്ടറി എ. സെയ്ഫുദ്ദീന്ഹാജി, മുജാഹിദ് സ്റ്റുഡന്റ്സ് മൂവ്മെന്റ് സംസ്ഥാന പ്രസിഡന്റ് ആസിഫലി കണ്ണൂര്, ലജ്നത്തുല് മുഅല്ലിമീന് ജനറല് സെക്രട്ടറി പാങ്ങോട് എ. ഖമറുദ്ദീന് മൗലവി, കേരള മഹല്ല് ഇമാം ഐക്യവേദി വൈസ് പ്രസിഡന്റ് പി.എം.എസ്. ആറ്റക്കോയ തങ്ങള് ആലപ്പുഴ, കെ.എം.വൈ.എഫ് ജനറല് സെക്രട്ടറി കടയ്ക്കല് ജുനൈദ്, അല്ഹാദി അസോസിയേഷന് പ്രസിഡന്റ് പാനിപ്ര ഇബ്രാഹീം മൗലവി, അന്വാര് വെല്ഫെയര് അസോസിയേഷന് സംസ്ഥാന ട്രഷറര് ചേലക്കുളം അബ്ദുല് ഹമീദ് മൗലവി, മുസ്ലിം യുവജനവേദി ജനറല് സെക്രട്ടറി അബ്ദുല് മജീദ് നദ്വി എന്നിവരാണ് പ്രസ്താവനയില് ഒപ്പുവെച്ചത്.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ